大陸客逼爆全港論壇 – 總結發言稿 (粵文版)

各位傳媒朋友、各位市民、各位街坊:

大家好,我係九龍角落主席李軒朗。今日嚟到呢個論壇,聽到好多朋友對於大陸客同自由行對香港各個社區嘅滋擾,都好困擾同反感。咁土瓜灣(嘅情況)呢排就比較多人講,不論係喺網上定傳媒都好——都好多人談論土瓜灣同紅磡嘅問題。咁但係我身為一個土瓜灣嘅地區工作者,我都要喺度講一次:其實呢個問題係一個全港性嘅問題,唔能夠再話將旅客「分流」到其他區,到嗰度逼爆又再「分流」去第三區咁樣;咁嘅做法係解決唔到問題。所以我喺度呼籲(亦都開始嘗試去做),各區嘅地區工作者、立法會議員、區議員,假若真正為香港人着想,就應該團結喺嚟,一齊向政府爭取由源頭開始減少呢啲自由行同大陸團嚟滋擾我哋香港各社區。

數字係唔會呃人,2018年頭十一個月,共有4千5百幾萬大陸旅客嚟到香港,拉返勻每日都成12萬人,香港根本上就冇咁嘅承載力去接待咁多旅客。所謂去「解決」呢個問題嘅方法,就係將呢啲旅客「分流」到本身應該係住宅區嘅社區;但係咁樣做除咗唔能夠解決「逼爆」嘅問題,仲會加劇港中矛盾,根本上係一個雙輸局面。偏偏特區政府同保皇黨地區人士係要咁樣「扯貓尾」,叫居民包容啲、着眼於經濟效益等等,去瞞混了事、敷衍我哋飽受困擾嘅香港人。

所以,我哋應該將「源頭減少大陸客」議題放上政治議程,交上立法會討論,要求政府交出一個確切可行嘅方案,咁樣先係解決問題嘅開端。我希望林鄭政府,賣咗港咁耐,係時候為香港人做返一樣嘢。

多謝各位。

發佈回覆

你的電郵地址並不會被公開。 必要欄位標記為 *