「陸客逼爆土瓜灣 居民生活要安寧」社區大遊行記者會 – 發言稿

各位傳媒朋友:

大家好,我係九龍角落主席李軒朗。

過往呢幾年,我哋見到九龍城區,尤其係土瓜灣同紅磡區,都飽受旅客逼爆之禍。無論喺社交媒體、 Facebook 群組上面,定係我哋平日見街坊嗰陣,都經常見到或者收到街坊對於畀旅客逼爆嘅投訴,居民覺得飽受呢啲旅客嘅滋擾。尤其是庇利街、崇安街沿線,接待團客嘅食肆、精品店、藥房、朱古力舖,可謂店舖林立;但其實呢啲店舖並唔係我哋當區居民而設,經濟成果能唔能夠流落小市民手上,實在成疑。

與此同時仲有(旅客)引發交通問題,例如旅遊巴違例泊車,甚至喺繁忙街道有 double parking (雙綫違泊)問題嚴重,令一啲嘅校巴同專營巴士需要喺中綫上落客,係一個好危險嘅狀況。當區除咗住宅區,仲有學校;除咗碧麗花園、榮輝大廈嘅街坊飽受困擾,附近嘅顏寶鈴書院同基道中學都係重災區,同學出入都受到影響。

同時,保皇黨地區人士一直同政府扯貓尾,一直講分流同加強執法;講咗分流、加強執法甚至裝閉路電視監察違泊,就當關心同解決咗個問題。但上次我哋論壇都提及,相關旅遊社或旅遊巴公司根本上當罰款係營運成本嘅一部分;同埋分流呢啲嘅講法,都係治標唔治本。保皇黨咁樣同政府扯貓尾就當自己關心同處理咗個問題,令我哋相當疑惑同憤怒。

根本上旅客逼爆九龍城、以至全港十八區嘅問題,問題源於旅客過多。部分人士一直盲目提倡將旅客分流去其他區(特別係其他住宅區),而缺乏長期政策措施配合,其實係治標唔治本,根本係十個茶煲九個蓋——他朝一日第二區爆咗,又會分流去第三區,周而復始。事實上 ,根據旅發局嘅統計數字,啱啱喺 2018 年頭十一個月,香港總共接待 6000 萬旅客,相當於每日差唔多 13 萬人次;其中唔過夜嘅中國大陸旅客係超過 2700 萬,佔總旅客人數嘅四成幾。所以,香港自身土地問題都仲未解決嘅時候,何來咁多承載力去到接待一年六七千萬旅客呢?所以,關注組其中一個訴求,就係要求檢討香港旅遊承載力,由旅發局或其他主管當局制訂《旅客承載力報告》,繼而訂立每月旅客封頂人數,真正實行「源頭減客」。咁樣先至可以還香港人同十八區社區應有嘅安寧。

正如剛才 Vincent(林正軒)所講,我哋聽日(1月26日)將會有遊行;除咗要邀請土瓜灣同紅磡嘅街坊關注同出席,亦都希望其他區受到同類問題困擾嘅朋友、街坊同地區人士一齊支持呢次遊行;團結就係力量,十八區嘅街坊同地區人士團結起來,去到關注呢個問題。最後,好感謝傳媒朋友嘅出席,亦好希望傳媒朋友繼續關注呢件事。

多謝各位。

發佈回覆

你的電郵地址並不會被公開。 必要欄位標記為 *